پنجاب حکومت نے سرکاری ملازمین کی تنخواہوں میں کٹوتی کی تجویز مسترد کردی

(بجٹ میں سرکاری ملازمین کو ریلیف دینے کے حق میں ہیں.بجٹ میں سبسڈی کلچر کی حوصلہ شکنی کی جائے گی۔ وزیراعلیٰ پنجاب سردار عثمان بزدار کی زیرصدارت اجلاس..)

                                                         

لاہور (اردوپوائنٹ اخبارتازہ ترین۔12 جون 2020ء) پنجاب حکومت نے سرکاری ملازمین کی تنخواہوں میں کٹوتی کی تجویز مسترد کردی۔ وزیراعلیٰ پنجاب عثمان بزدار نے کہا کہ بجٹ میں سرکاری ملازمین کو ریلیف دینے کے حق میں ہیں، بجٹ میں سبسڈی کلچر کی حوصلہ شکنی کی جائے گی۔ وزیراعلیٰ پنجاب سردار عثمان بزدار کی زیرصدارت اجلاس میں بجٹ 2020-21ء کی تیاریوں کا جائزہ لیا گیا اور مختلف تجاویز اور سفارشات پر غورکیا گیا۔

وزیراعلیٰ عثمان بزدار نے ہدایت کی کہ صوبائی بجٹ میں سبسڈی کلچر کی حوصلہ شکنی کی جائے اور سرکاری محکموں میں غیر ضروری اخراجات کا سلسلہ قطعی طور پر بند کیا جائے۔میسر انسانی وسائل کا بہترین استعمال کرکے کمی کو پورا کیا جائے اور موثر انتظامی اقدامات کے ذریعے کم از کم انسانی وسائل کے ذریعے زیادہ سے زیادہ نتائج حاصل کئے جائیں۔

پی او ایل اور دیگر مدات میں کفایت سے سرکاری وسائل میں بچت کی جائے۔ محصولات میں اضافے کیلئے تمام تر ممکنہ اقدامات کئے جائیں۔ انہوں نے کہا کہ بجٹ کو عوامی توقعات کے مطابق بہترین بنا کر پیش کیا جائے۔ سینئر صوبائی وزیر عبدالعلیم خان، صوبائی وزراء راجہ بشارت، ہاشم جواں بخت، چیف سیکرٹری، چیئرمین منصوبہ بندی و ترقیات، سیکرٹری خزانہ اور متعلقہ حکام نے اجلاس میں شرکت کی۔

مزید برآں وزیراعلیٰ عثمان بزدار نے احتیاطی تدابیر کو مزید موثر بنانے کی ہدایت کرتے ہوئے کہا کہ اراکین اسمبلی کے تحفظ کیلئے پنجاب اسمبلی کے بجائے مقامی ہوٹل میں بجٹ سیشن ہورہا ہے۔ کورونا کی وباء نے ہر طبقے کو متاثر کیا ہے۔بجٹ میں کمزورطبقے کے تحفظ کے لئے اقدامات تجویز کیے جائیں گے۔ انہوں نے کہا کہ عام آدمی کو ریلیف دینے کیلئے جامع منصوبہ بندی کرلی گئی ہے۔

اگلے مالی سال کے بجٹ میں ہرطبقے کا خیال رکھا جائے گا۔ کورونا کی وجہ سے سرکاری محاصل کی وصولی میں کمی ہوئی۔ انہوں نے کہا کہ عام آدمی کی معاشی مشکلات کا ازالہ ہماری پہلی ترجیح ہے۔ مشکل ترین حالات میں بھی عوام کو ریلیف دینے والا بجٹ پیش کریں گے۔ غیر ضروری اخراجات کم کریں گے۔ پنجاب حکومت نے دو برس کے دوران عوام کو سہولتیں پہنچانے کیلئے ریکارڈ قانون سازی کی ہے۔

انہوں نے کہا کہ پنجاب اسمبلی کا قانون سازی کے حوالے سے ریکارڈ دیگر صوبوں کی اسمبلیوں کے مقابلے میں سب سے بہتر ہے۔ ہر لمحہ عوام کی خدمت کیلئے وقف ہے۔ ہمارا ایجنڈا صرف اورصرف عوام کی خدمت ہے۔سابق حکمرانوں نے صرف ذاتی مفادات کا تحفظ کیا۔انہوں نے کہا کہ تحریک انصاف کی حکومت معاشرے کے ہر طبقے کی زندگیوں میں آسانیاں پیدا کر رہی ہے۔

عوام کی خدمت کا مشن پورا کریں گے۔ عوام کھوکھلے نعرے نہیں، عملی اقدامات چاہتے ہیں۔انہوں نے کہا کہ اپوزیشن کے پاس فلاح عامہ کا ایجنڈا ہے نہ کورونا سے نمٹنے کا۔ ماضی کی طرح اب صوبے میں ذاتی پسند و ناپسند نہیں بلکہ میرٹ اور گورننس کی حکمرانی ہے۔ہماری نیت نیک اور سمت درست ہے۔انہوں نے کہا کہ اپوزیشن صرف نان ایشوز پر سیاست کر رہی ہے۔تنقید کی پروا کئے بغیر عوام کی خدمت کے سفر کومزید تیزی سے آگے بڑھائیں گے۔