صوبہ پنجاب میں کورونا وائرس کے باعث حالات مزید خراب

(گزشتہ چوبیس گھنٹوں کے دوران مزید 50 کے قریب افراد کورونا کے باعث جاں بحق...)

لاہور (اردو اخبار تازہ ترین۔ 23 جون 2020ء) صوبہ پنجاب میں کورونا وائرس کے باعث حالات مزید خراب۔ گزشتہ چوبیس گھنٹوں کے دوران مزید 50 کے قریب افراد کورونا کے باعث جاں بحق۔ تفصیلات کے مطابق صوبہ پنجاب میں کورونا وائرس سے متاثرین کی تعداد میں تیزی سے اضافہ ہو رہا ہے جبکہ مہلک وائرس سے جاں بحق افراد کی یومیہ تعداد بھی بڑھتی جا رہی ہے۔

تازہ اعداد و شمار کے مطابق پنجاب بھر میں گزشتہ چوبیس گھنٹوں کے دوران کورونا وائرس نے 48 جانیں نگلی لی ہیں جس کے بعد صوبے میں مہلک وائرس کے باعث مجموعی اموات کی تعداد 938 ہو گئی ہے۔

پی ڈی ایم اے پنجاب کی جانب سے کیے گئے ٹوئیٹ میں بتایا گیا ہے کہ صوبہ پنجاب میں گزشتہ چوبیس گھنٹوں کے دوران رپورٹ ہونے والے کورونا کے نئے کیسز کی تعداد 2 ہزار 705 ہے جس کے بعد کورونا سے متاثرین کی مجموعی تعداد 50 ہزار 87 ہو گئی ہے۔